يا وخياني يا وخياني
راهو حب بلادي كواني
والجنسية ما عطاوهالي
وانا مكبّش نحب ناخو الجنسية التونسية، وحتى كي شرطو عليا 3 جرائد تونسية ناخوها كل يوم قبلت وزت اجتهدت وولّيت ناخو معاهم في جريدة بالفرنسية هي " لو تون" بيناتنا نلقا باش نقرطس وباش نمسح بلاّر الشّبابك.
لكن شي ماحبوش يعطيوني الجنسية. وبما اني كائن فضائي وعندي امتيازات على الأرض قلت برا نقابل سيادة الرئيس متع تونس.
أيا دقيت على الشباك وقعدت نستنّا. أنا هكاكا ونسمع في بكا وعياط. دارو بيا لحنوشة ودخلوني ملباب. قلتلهم ياخي موش في تونس لعباد لكل يدخلو مشبابك؟؟ قالولي دوويو تعيا ونتي تقبض، راك ماكش في تونس، إنت في القصر والقصر دولة وحدو لازمك فيزا باش تدخلّو.
المشكل هي إلّي أنا كي خترت الشباك اللّي باش ندخل منّو طلع بزهري الخرا شبّاك سي محمّد.
المهم دخلوني وجاني سيدكم الرئيس في روب دو شومبر بالنّوّار ويحك في خشمو، مسكين وواه جات المدام بسورفاتمون.
قعدوني وهوما واقفين قدامي.
قلّي يا هم شبيك جاي عقاب اللي؟؟ ناوي تسرقني؟؟ تي ماعندي شي في هالبلاد فلوسي الكل بعثتهم للخارج وهو قاعد يحك في خشمو.
قتلو لا يا سيدهم، أنا جيت نشكيلك، راني نحب على الجنسية وماحبوش يعطيوهالي
وديما يدو في خشمو يحكّ فيه.
قلّي تعرفش كيفاش؟؟ هاو نومرو نسيبي أطلبو تو يعاونك، وكان عندك شويا فلوس تو يقضيلك في دقيقة وتولّي مواطن تونسي ومحروم من حقوقك السياسية.
وهو يحك في خشمو
أحنا هكاكا وجا وزير الاقتصاد.
سي الوزير أمورو ماتعجبش الموازنة المالية كي وذني
المعلم وهو يحك في خشمو قالو
تي ماو قتلك كلم نسيبي برّا كلمو يا خرا تو يحلّك المشاكل الكل
مشا لوزير وجا الطباخ متاع القصر يسئل على العشا شنوة
المعلم يحك في خشمو قالو كلم نسيبي شاورو
أنا هكاكا والمدام كرّزت قتلو تي شنو ماناش باش نرقدو ياخي؟؟
حكّ خشمو وقالها......
..............................
..........................
حتّى نشاور نسابي
حكّيت أان خشمي وقلبت منظري وقبل ماننسى خذيت نومرو نسيبو
ليست هناك تعليقات:
إرسال تعليق