تنحية ملامة وعمار 404

أيا لولاد اذّكّرتوني ماهو؟؟ أنا الكائن الفضائي اللي كل مرة نحكيلكم على الكوكب الي نعيش فيه الكوكب الباهي المزيان اللي فيه لون برك ومافيهش طحانة والعباد الكل تحب بعضها والحكومة في خدمة الشعب.....أيا المرة هاذي صدمتني حاجة غريبة صدقوني عندي شهر نحب نفهمها ولليوم ملقيتهاش..الحاصل قريب نضيع الفيستة ومافهمتش...ماني قلنلكم اللي أنا مبعوث خاص من بلادي وقاعد نعمل في دراسات على الكائن البشري والتونسي خاصة.والحل اللي لقيتو هو انّي نعمل كونت فايسبوك ..المهم حليت كونت وقلت برّا اشّقنس واتعرّف على النّاس..مبعد بنهارين ، عصباح جيت باش نحلّ الكونت متاعي قالّي عصصصصب اح باش تحلني ؟؟ لوّح عليك..ورفض الصّخطة.فهمت اللّي هوما فسخوه..أيا عاوت الثاني وأنا لاهي نبعث في انفيتاسيونات لصحابي وهوما يبعثولي ..المهم مشيت باش نرقد فرحان...مبعد جمعة ولاّ ثنين جاني ميساج من طفلة مانعرفهاش قتلي راهو المبيد الحشري حاطك في القناص وحاطلك برفيلك على صفحتو...بون أنا ستغربت علا خاطر الدين الإسلامي معروف بالتسامح ويدعو للنقاش موش القرصنة والتعسف...وزت ضبّعت كيف من غدوة الكونت تفسخ مرّة أخرى .المهم ولاّتش حكايت عناد، مشيت عملت كونت آخر...والمرّة هاذي قلّي 404 نوت فاوند...الرّبّ الكريم شنيا هالحكاية؟؟ ياخي مازال عندكم 404 في تونس؟؟ أحنا حتّى الهامر قريب نقطعوها ...تي ولاّت ديمودا...الخلاصة هاتو اعطوني قرطلتي ماحاشتي في عنب، غدوة نروّح وحتى كان ماروحوش بيا تولي غدوة نحرق.

..وإلى اللقاء في حلقة جديدة