أيا سيدي أنا الكائن الفضائي، بالطبيعة اذكرتوني، ماني بعد مادرت البلدان الأرضية الكل وأنا نعمل في دراسة على الكائن البشري. قررت باش نستقر في تونس.
اي باش نستقر في تونس، آش ناقصها تره؟؟ بلاد الأمن والأمان، مافماش قمع للحريات، بااارشا نقابات تخدم على رواحها وبالطبيعة النقابيين التوانسة فاهمين الدور متاعهم بالصحيح، إل توّا ماريت واحد فيهم دخّل نشاطو السياسي في النقابي، تي في العالم الكل العمل النقابي شكشوكة ولازم تدخل فيها السياسة، لكن في تونس الشي هذا موش موجود.
بالأمارة نقابة التعليم الثانوي في بنزرت عملو اعتصام قدام المندوبية الجهوية للتربية على خاطر الوزير زادهم في فلوس الإصلاح في الباكالوريا.
لا لا موش عملو هكاكا على خاطر ميحبوش الزيادة وحاسين بالأزمة العالمية..لكن على خاطر كي زادوهم تشاورو مع جماعة الحزب الحاكم أكاهو. تي نرجعو ال موضوعنا الصحيح الي هوما عملوا اعتصام عل سبب واضح وفي نفس الوقت هازين بلايك فيهم " لا لسفارة أمريكية على الأراضي التونسية" ووحدة أخرى فيها " جيوشنا في العراق تحارب...." تي بالله شمدخلكم انتوما في السياسة التونسية؟؟؟؟
حاسيلو بما إنّي نحب نستقر في تونس ونجيب المرا والصغار يعيشو في أرض الحريات والتعددية والأخلاق،قالولي لاومك تاخو الجنسية أي أي الجنسية جملة وتفصيلا... وبما إنيباش ندخل فلوس للدولة من الأمم المتحدة هام سهلولي في الشروط باش ناخوها هالجنسية.
قالولي تشري كل يوم ثلاث جرايد هي الصباح والشروق و.. الموقف.. تي لا غلط هذيكا حكاية أخرى متع " إل|ي ياخو جريدة يدخل يتفرج في السهرية ومعاها كعبة بقلاوة لكن بلاش بابيي سرفيات ماو بالطبيعة تحط البقلاوة في الجريدة. فهمتو توّا؟؟
الرب الكريم أنا الروتين والستراس ضربوني بفاس على قبّي
خليوني نسكت خير ملّي يبطلو ومايعطيونيش الجنسية. ناخوها ومبعد نحكيو
ليست هناك تعليقات:
إرسال تعليق