تنحية ملامة...

أنا من كوكب بعيد، فيه بلاد الدنيا لكل فيها لون واحد لون الفرحة. أيا ياسيدي ريتكم انتوما سكان الأرض داخلين بعضكم حبيت نحكيلكم على بلادي باش تاخذو المواعظ.
أحنا بلادنا نظيفة ياااسر نظيفة، تي أنا ساعات نهز ولاد الحومة ونعملوا حملة نظافة, رغم إنو السلطات موش مقصرةتي شوارعنا "بارتار" تشوف فيه وجهك.
في حومتي,الامن والامان, تي ساعات بابا يهز جراية في الليل ويخرج يرقد في راس النهج.
حاسيلو, إلكلناوطنيين، تي على سبيل الذكر وبره، أنا مرة تعاركت معا جاري، ما تخافوش موش على حيط ولا على زيقووات، لا على حرثا لا على ورثا، لكن تعاركنا شكون وطني أكثر من صاحبو، حاسيلو مشينا للمركز.ماو الجندرمية هوما اللي لاهين بالحكايات هاذي، تي قلتلكم الدنيا عنا ياسر منظمة.
حاسيلو، استقبلنا عرف الجندرمية، باسنا كل واحد بوستين وقبل ما نتكلموا قالنا شنيا قهاويكمقتلو أنا هاتلي.... قص عليا السيد وقال لا قبل القهوة يلزمكم تفطروا، يا ولدي لا تي لا والله ماصارها حاسيلو كبش "وأحنا في خدمة المواطن ، إنتوما أولا...."أيا حاسيلو فطرنا وشربنا قهاوينا،.....
أحنا هكاكا وجا واحد من الجندرمية ومعاه شويا ولاد، عرفنا مبعد إلي هوما طلبة، أيا سيدي الطلبة هاذوما حكايتهم حكاية، هاذوما إيشوهو في وجه البلاد، قالك معتصمين ولا شنيا، غريبة، صدقوني في بلادنا، هاذي غريبة تي آش يحبوا، تي كل واحد عندو بيت في المبيت إلي يختارووفيها الأنترنات و تلفزة و بلاي سيايشن ثري وحاسوب عائلي هدية وكل شي بلاش. لكن الجماعة هاذوما اعتصموا باش ينقصو من ها المصاريف المجحفة للدولة. وياسيدي زادو ولاو يدخلوا في حاجات ما تعنيهمش ، إيحبوا يا سيدي بن سيدي ينقصو من نحة البطالة، قالك بارشا ويحبو يعطيو منها شويا للرياضة تي حتى 3 مليارات، على خاطر ها القطاع موش لاقي حضو.
كيف كيف باسهم عرف الجندرمية وجابلهم الفطور والقهاوي...
لهنا إخوتي روحت أناوجاري وأحنا الزوز شاكين في وطنيتنا ، شوف هالطلبة كيفاش يخافو على مصلحة الدولة وأحنا طلعنا نحبو رواحنا....
يتبع