كالعادة ليوم قمت منّوم متأخر، ماني نخدم الثمنية وانا ديما نقوم الثمنية. أيا كالعادة دوش، لكن الفطور ملقيتوش، الجماعة ماقاموش منّوم، طلعلي لعصب، لعنت الشيطان وخرجت، تعديت للقهوة، فطرت غادي، وهزيت قهوة في يدي ومشيت نخدم.
وكالعادة أول حاجة نحل الأنترنات ونعمل طلة على الجموع الكل، ولا سيما هالأيامات فما حركة كبيرة بسبب الخراواط عمار الي يمشي حافي بلا سباط، يسكر في لا كونت وحتى البلوقات.
أيا أول حاجة لقيت واحد عملي يجي ستة كومونتارات، فيها سب علني، يا طحان يا امّسّخ، ونا صدقوني كل صباح ندوّش. المشكل السيد هذا يستعمل في كونت صاحبو وهو و صاحبو نعرفهم بلقدا، مام با جمعتين لتالي حكيت أنا وياه في حكايات الدين وقلي نحترم رايك، اليوم مفهمتش آشبيه..
حاسيلو لعنت الشيطان المسكين مرة أخرى، وقلت برا نعمل طلّة على البلوق،.... قلي دووييو تونتحل بكري، راهو عمار جاني البارح وقلي ياخي ماقت كات انت وانا نقول شبيهم ما خلصونيش ايجا هنا وجبد المقص ونزل عليا.
المرة هاذي آش باش نقول؟؟ باش نلعن الشيطان المسكين مرة أخرى؟؟ مايستاهلش مسكين، تي هو خير من هالهم السيستام اللي عنّا.
وهاني قعت حاير، ونخمم
يظهرلي هالمرة مافيهاش، الكونت فايسبوك مصنصر، البلوق مصنصر، الكنام تقص، الصندوق القومي للتضامن والحيطة الاجتماعية يقص، القباضة تقص، الدخان فيه انتاريس، حتى القبر الميترو متاعو باكا الحسبة.
آشنوة الحل؟؟؟
ليست هناك تعليقات:
إرسال تعليق